Mat 19 | BEF | STEP | Yesu ya'ma kaga lu epi su holoto Galili hepatogati he'mito Yutia kapogu, Yotani nagami'i muya beletoga bu'ehina.

Matthew 19

Bomouba liha'amofihi le'mo he'milinamo'mu Yesu lu'ehina

Mk 10:1-12

1 Yesu ya'ma kaga lu epi su holoto Galili hepatogati he'mito Yutia kapogu, Yotani nagami'i muya beletoga bu'ehina. 2 Ya nobigo babu boana'magi mege'i melelete anaga neheti'ahana. Yesu analo'i enebesise bona'i enele'mo bati hu'ehina yabe.

3 To Felosi bona'i mone'amagi ai nohinalo ete fi taga nehite loka he'ahana: Lali keya kaguti henana ni'igo bo moneuba liha'amofihi fa'mene le'mo he'milenogo bati huto ni'ifiye? 4 Yesu lu epi'ehina: Lenali mono bukugu bu gelete ana ka mekeheli'ahanafiye? Ya'ma kagaguti go'ehina:Yata'a kanagu Hu'mau bomo hiti a'mo hiti lolo hu molo'ehina yabe. 5 Ya lolo hu'ehinagi bouba ito'afihi afo'afihi noha'atitiguti he'mito liha'a le'moto bigo etali nupa hite minete moneko bona'i minala'ibe. 6 Etali loe bona'i meminese hite'atiti moneko bona'i nemina'ina yabe. Hu'mau etele'mo moneko hu'ehina alobole lenali bona'magita loko mehi etatalo. 7 Ya ligo Felosi bona'magi loka he'ahana: Koyapa Moseu kaga molo'ehina'auba bo moneuba liha'amo'mu fayahi goloto li emito le'mo he'milube'mu hu'ehinaya henabe lutobe? 8 Yesu lu epi'ehina: Moseu komopatinigu sibina huse'na kehelito fayahi agobo luto liha'amo le'mo he'miloto ya hilina ni'ibe. Yata'a Hu'mau asaga lolo hu'ehina kana'agu ya he'miloto meni'ibe. 9 Nani lu nolepube. Bo moneuba liha'a fato bolo mebu'ehinamofihi le'mo he'miloto fato a'i lilina huto gumina nofalabe, Yesu ya luto lu'ehina yabe.

10 Ya ligo koko pana'amagi lu emi'ahana: Yana huse'namo ni'igo bomouba liha'a meliloto fa'mene minolenogo bati huto ni'inagihe, lite li'ahana. 11 Yesu lu epi'ehina: Asaga boana'magi enali ya'mana kaga melilana'mu yabe. Hu'mau ai bo luga'amagihi amuya epi'ehina, enali ya'ma bomagigo lilana'mu yabe. 12 Kehelilo. Bo enali komopa'anigu kaga fato fato'i ni'ina'mu lite ana'i menelibe. Bo luga'amagihi ito'anifu a'i melise minose bo enegetelata nehabe. To bo luga'amagihi enugufa laga hago ana'i melise neminabe. To luga'a bomagi kokuluma kapolo enekesa keheli emite minete mono ka fato fato melugu leli'ali hilune lanamagi liha'ani melise minalune lite lu laga hite neminabe. Bo moneuba ya'ma kaga keheli bati hilube lilina ai keheli bati hino.

Yesu yagapana'i lusa gi epolo'ehina

Mk 10:13-16; Lk 18:15-17

13 Ya'mana yupahi enali yagapana'i lagaso meso'a Yesutoga enele'mete e'ahana. Enali Yesu enugufalo yahi liloto nunumu hu epalalibe lite yabe. Ya nehago ana bona'i Yesuhi koko pana'amagi ka epeki'ahana. 14 Yesu lu'ehina: Lenali yagapana'i he'mi epelenogo nanitoga eno. Lenali enele'mo memalalo. Kokuluma kapoya yagapana ya'ma'asimagihina ni'ibe. 15 To Yesu enugufalo yahi liloto lusa gi epoloto he'mi epoloto bu'ehina.

Neheya kola bo fe'noha'a babu lito nina bo

Mk 10:17-31; Lk 18:18-30

16 Mone yupahi bo moneuba Yesutoga nehetiloto loka ho'ehina: Tisao, nani hetofa suhi hena huto huloto'ni minoba minoba hepa'i lilube? 17 Ya ligo Yesu lu emi'ehina: Hena hibe luto hetofanamu noloka nohane? Moneko kene'isi nohina Hu'ma aisigo bati hu'ehibe. To kai minoba hepa'i lilube lutomo keya ka li pili koloto mege'i molobo. 18 To ana bouba Yesuhi loka ho'ehina: Hena keya kabe? Ya ligo Yesu lu emi'ehina: Keya ka ma luto ni'ibe:Kai bona'i ho mefilibo. Kai bo alobole etele'mo loko mehubo. Kai gumina mefolobo. Kai bo mone'mofihi faga faga lu meemibo. 19 Kai itokafinogo afokafinogo agoya hu etimibo. To kaika kele'mo bati hilana suhi luto kalalukagihi enele'mo bati hubo. 20 Ya ligo neheya kola bouba lu'ehina: Ya'ma asaga keya ka nani liyafa huto mege'i amolo'ohube. Ana'ina mone'a henana hiti hilube? 21 Ya ligo Yesu ana neheya kola bomofihi ma luto lu emi'ehina: Kai bati huto minalube lutomo asaga fe'nohaka buto bona'i noepito efahi lilotoka guna ito musufalo bona'i epibo. Ya hitogo hetofanaka kokulumalo minalibe. To kai ya huloto nani'i oto nemege'i molobo. 22 Ya'mana neheya bouba Yesu lina kaga keheliloto ipagu gabu gigo ginaga fina bo kaga meluse bu'ehina. Hena'mugope ai fe'noha'a babu lu'ehina bo nohuto ai ana fe'noha'a fato bona'i meepilube luto'a ekesa kehelito bu'ehina yabe.

23 To Yesu koko pana'a ma luto lu epi'ehina: Nani ma'naka luto lu nolepube. Fe'noha'a hiti bouba ai kokuluma kapo'alo tilinaya aitoga sipi keta hu etalina'mu yabe. 24 Nani mone'a hiti kaga lu lepilube lu'ehina. Kameli yagauba kata hetise neka'mofihi hokolo kapo'agu nesi'asi keta besinogo tilinaya to fe'noha'a babu luto nina bouba Hu'mamofihi kapo'alo bilube'mu hilinaya sipi keta besilina'mu yabe luto Yesu lu epi'ehina yabe. 25 Enali koko pana'a ya'mana kaga'a kehelilete topa helete ma lite li'ahana: Ya latago minoba minoba hepa'i kuyu'afu lilinabe? lite Yesuhi loka he'ahana. 26 Ya lago Yesu enubugu enogo fiya iloto ma luto lu epi'ehina: Ma melugu bona'magi ya'manana mehilana'mu yabe. Hu'mau aisigo asaga'na lolo hilina'mu yabe.

27 Yesu ya ligo Pitau kaga'alo nona'a lu emi'ehina: Kai bu gobo. Lali asaga fe'nohati he'miloto kai'i kemege'i moloto noone. Ya nohuta lali henana liluta ni'ibe? 28 To Yesu ma luto lu epi'ehina: Nani ma'naka luto lu nolepube. Alihi asaga'namagi yuhufanago lolo hilina yupahi Kokulumaguti limi'ehina Bo ai fana mehenagu minoto kibina bomofihi kefa hisalo minalina'mu yabe. To nani'i nemege'i melete mine'ahana bomagita ya'mana yupahi 12 kefa hisalo minalana'mu yabe. To lenali ya hilete Isilaeli naga'i 12 magihi kaba hi epalalabe. 29 To enali bona'i luga'amagi nani kumu lite enekesa yigilete noha'anifi enogona'anifi enetali'anigifi ito'anigi afo'anigihifi yagapana'anifi to foya'anifi he'milete nanitoga alanamagi enali anana'anilo babu lite lilana'mu yabe. To enali bati huto minoba minoba hepa'i lilana'mu yabe. 30 Ya hu'ehina babu bo luga'a yatai yata'a kohe kohe hite nebanamagi aliha'a yupahi alihi alabe. To babu bo luga'a enali alihi nebanamagi alihi yupahi enali kohe tete bilana'mu yabe. Yesu ya'ma luto lu'ehina.